#شعر | عبدالله الطلحي: مدرسة الصبر

قصيدة رائعة بكل المقاييس تحمل كينونة الحكمة وأصداء التجربة الحياتية من شاعر يتقن كتابة الشعر فنًّا ومضموناً هو الشاعر السعودي القدير عبدالله الطلحي الهذلي..
تأمّل قوله:

وتنظر وتعجبْك القصور المزخرفه
وسر البنا ساسه  وقوة دعايمه
ويعجبْك مطلاع الصقور وهدادها
ولولا خفاف الريش ماهي بحايمه

هي قصيدة لشاعر يرتقي بالشعر العامي إلى المستوى الرفيع، دون الجنوح إلى الإيغال في الغموض،ودون الوقوع في النمط الشعري التقليدي:

نهارك حجازي به الشمس غايمه
وليلك  تهاميٍ  عليله  نسايمه

وهذا الربيع وبعده الغيم ينجلي
ومقبل عليك القيظ تحرق سمايمه

ترى الوقت مايعطيك متعه بلا ثمن
ضياع العمر لابد تدفع قسايمه

وبكره تلوم الوقت وتقول غرّني
ومن وين لك صبرٍ تقاوم هزايمه

زمان الرخا حلوٍ طعامه ومشربه
يغرّ الفتى لامن غرق في نعايمه

ينسّيه وشلون المراره وطعمها
ويغفل ويحسب حلو الأيام دايمه

والإنسان في حاجه لهمٍّ يذكّره
ونفسٍ بلا همٍّ ف الأحلام هايمه

ووقت الشقا كلٍّ يذمه ويكرهه
لكن التجارب والحكَم من غنايمه

يبيّن لك الصاحب ويكشف لك العدو
ويمكن يورّيك الفتن وين نايمه

وللصبر مامثله معلّم ومدرسه
وخرّيجها  تطلع قويه  عزايمه

وانا خذت من دنياي عبره وتجربه
حياتي سفينة فوق الأمواج عايمه

نويت السفر قِبله ورافع شراعها
وعارف طريقي مير عيت تلايمه

تلاعب به الأمواج من كل ناحيه
ويومٍ جنوبيه  ويومٍ  مشايمه

وانا ذقت بالدنيا حلاها ومرها
نهارٍ ترام وعشر ماهي برايمه

ولاحالي  الّا  والمراره  تخالطه
ومن لامني عن جهل ماني بلايمه

ولافي الحياة احلى من الستر والغنى
عن الناس لو نفسك عن الزاد صايمه

ولا أمرّ من صبرٍ على الضيم والقهر
ولا اشدّ من ضيم القريب وظلايمه

ومن قال انا صابر على المر ماصبر
صبر واحدٍ محدٍ درى ويش ضايمه

وكم واحدٍ يعجبْك زوله ومنطقه
براءة صبيٍّ دوب سووا  تمايمه

تبيّن له اسرارك وتعطي له الثقه
ومن يوم يقفي عنْك ينقل نمايمه

توخى الحذر من كل حيٍّ تقابله
صقور الزمن هذا ضحية حمايمه

ترى كل شيٍ مخبره تحت مظهره
تطالع لمخ  الراس ولّا  عمايمه

وتنظر وتعجبْك القصور المزخرفه
وسر البنا ساسه  وقوة دعايمه

ويعجبْك مطلاع الصقور وهدادها
ولولا خفاف الريش ماهي بحايمه

وخضر الغصون الوارفة من جذوعها
وظهر الفرس  ماشاله  الّا قوايمه

وطعم العسل ماهو سبب قيمة العسل
ولولا  علاجٍ  فيه  محدٍ  بسايمه

إذا حزت في دنياك حكمة ومعرفه
ونفسٍ عن اللي يورث الذل شايمه

ورزقْك الله الإخلاص في القول والعمل
وبعدٍ عن اللي منهمك في جرايمه

تعلّيت مثل الصقر في نايف الحجا
يشوف الرخَم ماشاركه في ولايمه

وجهزت نفسك للقيامه ويومها
لو انّ القيامه بكره الصبح قايمه